खान मन छैन
खान मन छैन भन्नुभन्दा उपयुक्त बहाना छैन
थाहा छ कसौडीमा आमालाई पुग्ने खाना छैन ।
जसलाई बाटो छाडदा म लडे, उही हासेर गयो
महोदय ! अरूको भलो चिताउने त जमाना छैन ।
फुटपाथमा लुगा बेच्नेहरूलाई जरिवाना छ यहाँ
कलिला नानीको लुगा च्यात्नेलाई जरिवाना छैन ।
बगर हुँ, उसको पैतालाको डोब अझै छ छातीमा
ऊ पानी रहेछ, जहाँ म बसेको कुनै निसाना छैन ।
भितो लड़ने डर पनि सकिन्छ एक बर्खापछि
अब हुरीको डर सकियो हिजोदेखि छाना छैन ।
-प्रदीप रोदन( मफलर बाट )
